Чӑваш Ен ҫитес ҫул 90 ытла троллейбус туянӗ. Кун пирки Чӑваш Ен правительстви хыпарланӑ.
ДОМ.РФ облигацисене усӑ курассипе ӗҫлекен Правительство комиссийӗ Шупашкарти агломерацин электротранспорт паркне ҫӗнетес енӗпе республикӑна ырланӑ.
Ҫавна май республика 92 троллейбус туянӗ. Пӗр пайне «Шупашкар – Ҫӗнӗ Шупашкар» маршрутпа ярӗҫ. ЧР Элтеперӗ Олег Николаев пӗрремӗш маршрута ҫулталӑк вӗҫӗнче ярассине пӗлтернӗ.
Ҫӗнӗ Шупашкарти стоматологи поликлиникинче тӗп тухтӑрта ӗҫленӗ Лидия Яковлевӑна тава тивӗҫлӗ канӑва ӑсатнӑ.
Лидия Андреевнӑна ырӑ сӑмахсем калама республикӑн сывлӑх сыхлав министрӗ Владимир Степанов, Чӑваш Ен парламенчӗн Председателӗн ҫумӗ Ольга Петрова, Ҫӗнӗ Шупашкар хулин администрацийӗн пуҫлӑхӗн ҫумӗ Ольга Матина тата ыттисем пырса ҫитнӗ.
Лидия Яковлева – аса категориллӗ тухтӑр, сывлӑх сыхлас ӗҫӗн отличникӗ, Чӑваш Республикин тава тивӗҫлӗ врачӗ, Ҫӗнӗ Шупашкарта пародонтологи службине пуҫарса яраканӗ. Ӗҫ биографине вӑл 1982 ҫулта стоматологран пуҫланӑ.
Ҫӗнӗ Шупашкарти Яковлевсем пӗтӗм ҫӗршыври «Ҫулталӑк ҫемйи - 2023» конкурсра палӑрнӑ.
Пилӗк ачаллӑ Александр тата Татьяна Яковлевсем «Семья – хранитель традиций» (чӑв. Ҫемье — йӑла-йӗрке управҫи) номинацире ҫӗнтернӗ.
Телейлӗ мӑшӑр пӗрлешнӗренпе 28 ҫул ҫитнӗ. Кил хуҫи — ӳнер промыслисен ӑсти, вӑл хулӑ авса сӗтел-пукан тата кил-тӗрӗшре кирлӗ ытти япала ӑсталать. Татьяна дизайнер тумӗн автор ателйине тытса тӑрать.
Мӑшӑр Ҫӗрпӳ районӗнчи Йӳҫкасси ялӗнчи тӑван килне те пӗрмай кайса ҫӳрет. Унта вӗсем пыл хурчӗсем тытаҫҫӗ, сад-пахчара ӗҫлеҫҫӗ.
Муниципалитетсенче пурӑнакансемпе танлаштарсан шупашкарсем тӳре-шара патне ҫырма питех те хастар. Регион управленийӗн статистики кӑтартса панӑ тӑрӑх, кӑҫалхи ҫулла Шупашкар ҫыннисем халӑх тетелӗ урлӑ тӗрлӗ ҫитменлӗх пирки 4,5 пине яхӑн хутчен систернӗ.
Шупашкарсем хыҫҫӑн хастарлӑхпа ҫӗнӗ шупашкарсем, канашсем тата улатӑрсем палӑрса тӑраҫҫӗ.
Республикӑра пурӑнакансем урамсене, парксене, ҫуран ҫӳрекенсене ҫӳремелли вырӑнсене хӑтлӑх кӗртме ыйтаҫҫӗ. Ҫурт-йӗрпе коммуналлӑ хуҫалӑхпа, общество транспорчӗпе тата суциаллӑ пулӑшу парассипе ҫыхӑннӑ ыйтусем те ҫынсене канӑҫсӑрлантараҫҫӗ.
Авӑн уйӑхӗн 12-мӗшӗнче ҫӳп-ҫап йышӑнакан комплексӑн Ҫӗнӗ Шупашкарти филиалӗнче граната тупнӑ. РГД-5 ятлӑскере тупсан комплекса ӗҫлеме чарнӑ, ӗҫлекенсене урама кӑларнӑ та ятарлӑ службӑсене чӗнсе илнӗ.
Специалистсем тӗрӗсленӗ те граната вӗренмелли пулманнине, унӑн детонаторӗ ҫуккине палӑртнӑ. Ӑна тата тӗплӗнрех тӗрӗслеме илсе кайнӑ. Кун хыҫҫӑн ҫӳп-ҫап йышӑнакан комплекс ӗҫлесе пуҫланӑ.
Ҫӗнӗ Шупашкарта пурӑнакан ҫамрӑк хӗрарӑм 5 банкра кредит илсе ултавҫӑсене укҫа куҫарса панӑ.
Хӗрарӑм патне иртнӗ уйӑх вӗҫӗнче ют ҫын шӑнкӑравланӑ. Вӑл хӑйӗнпе право хуралӗн тытӑмӗнче ӗҫлекен ҫын тесе паллаштарнӑ, хӗрарӑма такамсем улталасшӑн тесе тыттарнӑ.
Ҫав ҫын ӗнентернӗ тӑрӑх, хӗрарӑм ячӗпе темле арҫын кредит илесшӗн-мӗн, укҫи-тенке упраса хӑварас тесе «хӑрушсӑр» счёт ҫине куҫармалла-мӗн.
Хӗрарӑм ултавҫӑсем каланӑ банксене кайса кивҫен укҫа илнӗ. Кредит учрежденийӗсенче ӑна ултавҫӑсем пулма пултарни ҫинчен асӑрхаттарнӑ, анчах вӑл никама та итлемен. Кредит илсе пурӗ 2 миллион тенкӗ ытла укҫана такамсене куҫарса панӑ.
Авӑн уйӑхӗн 8-мӗшӗнче Ҫӗнӗ Шупашкарти икӗ арҫын Мари Эл вӑрманне, Звенигово районне, шур ҫырли пуҫтарма кайнӑ. Анчах ҫырла пуҫтарнӑ чухне пӗри ҫухалса кайнӑ. Тепри ӑна шыранӑ, анчах кӑлӑхах.
Ку хыпар Мари Элти ҫӑлавҫӑсем патне ҫитнӗ. Кӑнтӑрла вӗсем арҫынна шырама тухнӑ. Ку ӗҫе ахаль ҫынсем те хутшӑннӑ.
Арҫынна тепӗр кун, авӑн уйӑхӗн 9-мӗшӗнче, ирхи 6 сехет те 15 минутра тупнӑ. Палӑртмалла: вӑл 1952 ҫулта ҫуралнӑскер.
Ҫӗнӗ Шупашкарта 26 ҫулти арҫынна шыраҫҫӗ. Вӑл килтен авӑн уйӑхӗн 8-мӗшӗнче тухса кайнӑ. Халӗ те таврӑнман.
Андрей Сергеевич Артемьева «Лиза Алерт» хастарӗсем те шыраҫҫӗ. Вӑл 172 сантиметр ҫӳллӗш, ҫырӑ ҫӳҫлӗ, кӑвак куҫлӑ. Килтен кайнӑ чухне вӑл хура куртка, сӑрӑ кофта, тӗттӗм шӑлавар, хура кроссовка тӑхӑннӑ пулнӑ.
Ҫак арҫынна курнӑ тӑк ҫак номерсемпе шӑнкӑравлама ыйтаҫҫӗ: 8(800)700-54-52 е 112. «Лизы Алерт» инфоргӗ: Наталия (Симба), 89196666680.
Ҫӗнӗ Шупашкарта пурӑнакан ҫамрӑк улталаннӑ.
Банкра ӗҫлекен 26 ҫулти каччӑ мессенджерсенчен пӗринче пӗлтерӳ курнӑ. Унта хушма тупӑш ӗҫлесе илме май пурри ҫинчен пӗлтернӗ.
Каччӑ пушӑ вӑхӑтра ӗҫлеме хирӗҫ пулман. Мессенджерсенчи пӗлтерӳре каланӑ тӑрӑх, отельсемпе паллӑ вырӑнсене халӑхра сарма пулӑшмалла пулнӑ. Унӑн хӑна ҫурчӗсенчи номерсене броньлемелле, кайран ӑна вӗсен хуҫисем укҫана тавӑрса парӗҫ-мӗн.
Малтанласа каччӑн счечӗ ҫине, чӑн та, укҫа килнӗ. Анчах кайран тӳлеме пӑрахнӑ. Каччӑ 60 пин ытла тенкӗсӗр тӑрса юлнӑ.
Пӑтӑрмах тӗлӗшпе йӗрке хуралҫисем халӗ пуҫиле ӗҫ пуҫарнӑ.
Паян Андриян Григорьевич Николаев ҫуралнӑранпа 94 ҫул ҫитнӗ. Ҫавна май велосипедпа ярӑнма кӑмӑллакансем йӑлана кӗнӗ старта тухнӑ: Ҫӗнӗ Шупашкартан Шуршӑла ҫитнӗ.
Ку старт - юбилейлӑ. Акцие кӑҫалхипе 20-мӗш хут ирттернӗ. Палӑртмалла: велосипедҫӑсен старчӗ 2004 ҫулта йӑлана кӗнӗ.
Паян акцие 25 спортменран кая мар хутшӑннӑ. Вӗсен йышӗнче 70 ҫулти Любовь Федотова та пулнӑ. Вӑл велосипедпа ярӑнассипе - республика чемпионки. Спортменка ҫак акцие вуннӑмӗш ҫул хутшӑннине пӗлтернӗ.
+13.3 °C